الشاعر الكبير سعد بن راشد ال قاطع _نبذه عنه وبعض قصايده

[النايف]

نبذه عن شاعر بني خالد(القاطع)


بسم الله الرحمن الرحيم

عاش الشاعر الكبير سعد بن راشد القاطع الصبيح الخالدي حوالي الثمانين سنة
قضى ثلثها في البادية والتردد اثناء الصيف علي مدينة عنك والجبيل يقيم محاورة مع هذا ويرد بقصيدة على ذاك ملتزما رحمة الله الترفع والعفة عن الكلمات النابية وقبول((الجاه)) ان طلب الخصم ذلك . وقد تمكن رحمة الله من جميع اغراض الشعر وبحوره ففي الرد او المحاورة والوصف وشهد له وطلب وده كبار شعراء الخليج والجزيرة والقبائل المجاورة وقد عاصر الشاعر العظيم ابن جافور وفي محاورة له مع شعراء من الكويت شهدها النواخذة/الشملان والبحر.
جرت على ساحل منطقة المشعاب والذي يقع بين الخفجي والسفانية . وكان ذلك ابان موسم الغوص
وقال الشاعر الكويتي في نهايتها :

ياسعد وهقوني وانت موت حمر=من توهق بك الليلة تيبس لظـاه

فرد القاطع:

ليه قلصك يدورني وأنا بالبحر=حق قلصك ترى هذا وهذا معناه

وقبلها قال الشاعر الكويتي:

جمعنا لاتزبر مثل جمر حمـر=واعذابه عذاب اللي برجله وطاه

فرد القاطع:

جمركم لاوطيته لازم انه دمـر=لوأجيب الجراده جمركم مأشواه

أما في الوصف فقد أجاد وأبدع وله في ذلك:

اناراجياً باللي رفع قبة السماء= سبحان عازل ليلها من نهارها
نسيله ونرجي من فضيله يمـــــــدنا =عـــــــــــطاياه جزلات ونرجي كبارها
يجيب لنا وبــــــل الحيــاة فوق دارنا=دار(ن) سقا الله كل عام قرارها
يعله برعاد عليها اليانشا = يوصل غثوها ضبطانها من انقارها
حقوق رفوق ريضا ريف الهواء =وقوى المطرسيلها يشلخ زبارها
لامن نوينا واخضر الدارعندنا =مرابيعنا السودة وننصا ديارها
مرابيعنا اللي يمت القلب صوبها=كيفات دنيانا بنزلة قرارها
تعين بيوت(ن) بينات(ن) المن لفى=ودايم دلالها صفت(ن) فوق نارها
تلقى مزل بين جمر وملة= يبعدعمس راسك ابنت بهارها
لاصب لك من زاهبتها وسكرت= حمسهانكس ذاسلم اهلها وكارها
هل المرجله مايستطيعون للردي=يجيبونها لوكان غليت اسعارها
يجيبونها مابين دينه وحاضر = ويعطون فايدة النصايف تجارها
لادوه السراح للبل وروحت = ولاسنت قعدانها مع ابكارها
ولاذى اللقاح العام خلفه ومدني = والحيل منها تو شيطت عشارها
يعيش الضماير شوف خطوات مصغر=تمشا وراعيها يدرج حوارها
في فيضة(ن) يازين نوار نبتها= فيها الشقارا زايفات(ن) اثمارها
تخالط زماليقة على حدنبتها =تخالط ثمرها تجهرك في صفارها
يخلي الهزيله يرتكز فوق نيها= يجي نيها من غاربه لافقارها
منازل بني عمي هل الطيب والثنا=بني خالداللي ماشكا الضيم جارها
خوالد ياسعد منهم رفاقته =لاطارمن حمر النواظر شرارها
خوالدوخالدقايدالجيش للنبي= كم معركة في سلة الحرب زارها
اللي حضر تسعة وتسعين معركه=طوع اكبار الكفر ويتم صغارها
نعم لمن تعجب عيـــــاله فعوله=بمسجل التاريخ تقرا اسطارها
تمت وصلينا على سيد البشر =محمدالمبعوث يوم انحــــــشارها

وله رحمة الله وعفي عنة:

حبيبي حبل لي بالموده وصادنـي=كما وصف طير وهوبالفخ مطرافي
يمني ولايعطي ولايقطع الرجـاء=صدوق كذوب على الفجر حلافي

حفظ شاعرنا القرآن بالاستماع وبدون معلم اللهم الا انه يجتمع مع ابناء جماعتة الدارسين ويقرأون له وعرف الحروف والقراءة بدون معلم وعندما أستقر شاعرنا ابو راشد بمدينة عنـك وترك حيـاة البـادية والترحال أسوة بابناء المنطقة الشرقية حيث عملو في شركة ارمكو التي عمل بها شاعرنا عن طريق مقـاول سعودي ولانه لايستطيع ترك عشق البادية ولاجتمع مع بني عمه والمحاورات الشعريه فقد ترك العمل وقد قال قصيدة يخاطب بها المقاول منها:

أنا عندكم ياهل التوليت مالـي جـاب=عطوني حسابي شغلكـم جايـز عنـه
عطوني حسابي قبل أفنش بدون حساب= =وأذب الطريق برخصـة مابهـا منـه

وبعد ان استقر القاطع بمدينة عنك أختـاره جماعتـة (ال حيـه) من الصبيـح امـامـا
لمسجـدهم . فكـان الشاعر القاطع يـؤم المصليـن ويـرد على الشعـراء وكان محبوبا من جميـع بنـي خــالد صغيرهم وكبيرهم متواضعا الي حـد الخجـل كريـما عفـيف النفس واللسـان.
ولم يكن لشاعرنا غيـر ولد واحــد أسمـة(راشــد) وقـد توفي ابنـة في السفانيـة
اثناء احد عطل الربيع وكان مخيـم مع جماعتة ال حيه في تلك السنة وكاد ان يفقد عقلة لولا ايمانة بالله ومداومته على قراءة القرآن وقـد قال الكثير في ابنة من الشعـر ولم يطلع احد على شي منه وقد قيل بانه نظم قصيدة في ابنة استغرقت اكثر من ثلاث سنوات وقـد يعلم ذالـك احفـادة والبركة فيهم وكما علمت بان احد احفاده يقول وينظم الشعر.
بعد وفاة ابنة حاول شاعرنا تعلم قيادة السيارة رغبة منة بان لايحتاج لاحد ولم ينجح لضعف نظره وقد قال في ذلك مداعبات أخوانية كثيرة وقـد ترك الشعر الا من المحاورات الاخوانيه والشرعية
وأختم هذه النبذهبهذا البيت الحكيم لشاعرنا الكبير رحمة الله وغفر له:

اذا ماستطعت الطيب لاتتبع الردي=المستـتـر للطيبـيـن عـديـل
كيف الغنم تزمر بكبـر كفولهـا=على الجمال اللـي لهـا صقيـل
أنا شف بالي خبرة من وري مشعـاب=على عقلة سمـر الجدايـل يردونـه

وله هذه الحربيه المشهوره

بديت باسم الواحد الفـرد الرقيـب = والدين دين الله ومن يشـرك كفـر
الخالـدي مبـداه بالقـول العجيـب = مثايـل(ن) يشتاق لـه راعـي النـظـر
قم يانديبي فـوق عجـلات الخبيـب = حيل(ن) مراديـم(ن) رعـن نبـت الزهـر
هن منوة المشتاق بالدرب الصعيـب = ومكلفـات(ن) فـي مراسيـل الخبـر
تلفى بنـي عمـي اكعـام للحريـب = لارزت الرايات والنشـر الخضـر
خوالـد(ن) تـرد المعـارك ماتهـيـب = وردوا حياض الموت يوم الله ومـر
بامتوجات ضربهن ضرب عطيـب = ومشوكات ضربهن يفـري النحـر
وسيوف هن(ن)د تكسر العظم الصليـب = مضرابهـا لاصـاد عظـم ماجبـر
من ضرب جمع(ن) لانطح جمع الحريب = يـوم الملاقـى ماتتقـي وإعـتـذر
يوم إمتلى الميـدان شبـان(ن) وشيـب = ارعد رصاص(ن) سيله الـدم الحمـر
ياذيب ياللي بالخـلا تقنـب قنيـب = تصبح من الشوان تنحـاك الجعـر
ابشر بصيد(ن) من بعيد ومـن قريـب = عقايـر تاكـل بـهـا دب الـدهـر
ياهيـه يالمجمـول ياعيـن الربيـب = ياللي تحط الـروس بالجلـد العفـر
لاتعشقيـن الا مصليـت الحريـب = اللـي فعايلهـم يشـد بهـا الظهـر
من فوق جال مريخ شرقي القليـب = حل المثارا واشتعـل سـو القهـر
يلعب بها القاطع سعد لعب عجيـب = بأفعال ربعه شايـف منهـا الدجـر

تحياتي للجميـــــع

ابو نايف (عنك)

[فهد البويدي]

الشاعر :سعد بن راشد القاطع الخالدي.رحمه الله
واحد من اكبر شعراء بني خالد ويعتبر شاعر عنك الاول ومن فحول الشعر ويوجد له العديد من المحاورات والمساجلات
جادة قريحة الشاعر بهذه القصيده عندما زار منازل ربعه وجماعته فوجدها خاليه ولم تعود كما كانت من ذي قبل فيقول رحمه الله

ياسامعين القول صلو على النبي =واوحوا تماثيل عزلنا لحونهـــا
تماثيل ناقيها على شف بالي=كما راعي الدانات ينظر وُزونهـــا
كما راعي الدانات ينظر وينتقي=يذل يدغشها بشي(ن) يخونهـــا
انا ماهقيت ان المثايل تقلني=لاشك الهموم تكدر البال دونهـــا
قليل الهموم بلذة النوم يهتني=وبه ناس من همهم سهارى عيونهـــا
سهارى بمن وهمهم صحبة الردى=يبون المراجل جعلهم يدركونهـــا
حلاة الولد دام الليالي مساعده=تمر جال نفسه قبل بقعا تخونهـــا
في لطمة العايل وبالصدق والصخا=وفي ربعه مايقحم الباب دونهـــا
ذي لذة الدنيا وجنة نعيمها=لاصار ربعك كل يوم يجونهـــا
يوم اللاش والدلباج واللي كما المره=طربها ووناستها بترسة بطونهـــا
لاهي بلاتحلب ولاهي بتجلب=حمير(ن) حلاة سروجها في متونهـــا
عساها المحل لاعمر الله دارها=عسى ماوراها زامي(ن) حال دونهـــا
بديت الطويله لاسقى الله مجيها=وانا داله(ن) قبل اعتلي في ركونهـــا
حصل سبب مبداه ماحس خاطري=رمع بالضماير لين كثر اشطونهـــا
ذلْيّ منازل ربعنا اللي نودهم=خلايا ولا ضنيتهم ينزلونهـــا
مافايتين للمرابيع قدامنا=ولانرتجيهم مقبلات اضعونهـــا
تذكرتهم وهلت اعيوني اعبارها=هماليل لين العين يبست اشنونهـــا
قم يانديبي هات واختر من النضا=حمرا يشوق العين فعله ولونهـــا
حايل ثمان سنين ماجابت النما=عقب العسافه حيثهم يركبونهـــا
نحرها كما الباب وكما القوس زودها=اجلال(ن) مناكبها وساع ازغونهـــا
كما السطح مردفها اكبار فخوذها=شليل يجي مترين ويشف دونهـــا
جتنا وجبنا كل ماكان نالها=شكل النضا اللي زاهي(ن) في فنونهـــا
عليها شجاع حين ماركب كورها=زجرها وخلاها تزايد جنونهـــا
عسى اللي عطاناها يسمح دربها=لينه تجي اللي لالفت يكرمونهـــا
تجي لنا ربعنا هل الصدق والصخا=نشامى فنون المرجله يتبعونهـــا
سلامي عليهم كل ابوهم بلاعدد=على الطيبين ويخصراللاش دونهـــا
حنا نسايل عنهم كل من لفى=نقول الرفاقه ذيك وش رنق لونهـــا
عساهم بخير وصالحات احوالهم=ولابان فيهم خلة(ن) يشتكونهـــا
ان سايلو عنا بحال(ن) تسرهم=في حالتن ياليتهم ينضرونهـــأ
مسايير من هذا لهذا وسجه=وفي عشب ريضان(ن) اطوال اغصونهـــا
تقول ارتوازي كل يوم يعلها=صدوق(ن) من المنشى ثقال مزونهـــا
بمروبعات يعجب العين بنيها=ومخومسات بالعمد يرفعونهـــا
لاجا نهار الهيف تفتق ارفافها=من شان هشان الخلى يدهلونهـــا
وان مدد العساس خطوات بقعا=عقب المضحى ردت الزمل دونهـــا
طوينا ومدينا وققدنا اضعونا=نبي هجال(ن) حلوة(ن) يذكرونهـــا
نزلنا وشبينا من الرمث ضونا=ببلاش ياللي ناركم تشترونهـــا
هذي نقلطها وهذي نصبها=وهذي على جمر(ن)حمر يشعلونهـــا
واليا لفانا سنافي(ن) عقب غربه=نذبح هرافي كاسيات(ن) اصحونهـــا
ماننحر القصاب ونجيب ربعه=الا ارباع ىهذي ربعنا مايبونهــــا
نفعل ويفعل راعي الطيب مثلنا=والانذال لاتكرم ولايكرمونهـــا
الانذال غير المال مالهم اتجاره=والا الطيبين المرجله يتجرونهـــا
وختامها مني صلاة(ن) على النبي=اللي رفع بالحق عالي اركونهـــا

[فهد البويدي]

احد القصائد الغزليه لشاعرنا الكبير سعد القاطع الله يرحمه
قصيده غزليه عفيفه رائعه جزله يتوق لمسامعها ويطرب لها المتذوق للشعر
كيف لا وهي لشاعر عنك الاول سعد القاطع
وهالقصيده تلبيه لطب الاخ العزيز محمد القاطع لنشر وتجميع قصايد الوالد ابو راشد الله يرحمه

تل قلب فـي طريـق المـوده مبتلـي=يشتكي الله من حـب زاهيـة الوشـام
عاصي قلب الخطـا مايطيـع العاذلـي=مايذوق الزاد ومحـارب حلـو المنـام
من غزال واقف(ن) عنـد بـاب المنزلـي=لابس(ن) تاج الهوى يعترض لاهل الغـرام
ياغزال اشقر عفـر بالجمـال مؤهلـي=ياذهب مصبوب مابه من الفضه لحـام
لامتيـن ولادقيـق(ن) وعـوده ممتـلـي=والنهود بلبتـه كنهـن بيـض الحمـام
والثنايا كنهـن القحوان بالجلـي=من ورى حمر الشفايا وشذرات الزمام
ياعيـون مقرنـس(ن) للحبـارى يفتـلـي=كنهن بالقلب يرمن خطيـرات السهـام
كن قلبـي فـي سنعهـم يتـل وينتلـي=تل حبل الدلو لاصار مـع ورد الحيـام
تلهـا سكـراب دوج يسوقـه جاهلـي=ماتوقف لين كسـر محاصيـل المقـام
من يلوم اهل الهوى بالطـراد يجندلـي=بم خمس اللي مضاريبها تشدى العظـام
ذاك لـو هـو مثلنـا بالمـوده مبتلـي=كان يضرب للعذارى تحيـه واحتـرام
يسمع الطيب بقولـي ولايشـره علـي=والردي وش عاد لو كان يلحقني مـلام
ومن سمع قولي يقول الصلاه على النبي=واذكر الله واشكـره بالبدايـه والختـام

[عينك غدير]

قصيده شعر حربيه للعرضه ؛ تقدم من الشاعر المرحوم سعد بن راشد القاطع الخالدي قالها بمناسبة ذكرى حرب الخليج 1991 م كهديه للشباب السعودي خاصه و للشباب الخليجي بصفه عامه.

بسم الذي صلى له العالم وصام= الواحد المعبود رب العالمين
في ماجرى جتنا مراسيل العلام = والله على ماصار بالدنيا يعين
الخالدي مبداه في زين الكلام = مثل الذهب ينسام بالسعر الثمين
حنا على لازمك ياولد الأمام = للمعركه جندا وغير مجندين
يادارنا بالحرب دايم ماتضام= ونبشرك بالعز والنصر المبين
لازارك الحربي وسايقه الغرام = حنا هل التوحيد ضد المعتدين
وأن صار قومه مثل عمدان النهام = حنا جبال لاتصد ولا تلين
يوم ألتقا يامجير وياسلام = في ساعة فيها يشيب المرضعين
من ضربنا صاروا كما ربد النعام= خلوا بيارقهم وولوا هاربين
كله لعين اللي كما سرج الظلام= شقر البنات مولعات العاشقين
قومآ غزوا لديارنا عدوا عدام = ناس قتلناهم وناس مكلبشين
هذي فعايلنا ليا صار الزحام= عاداتنا وأفعال أهلنا الأولين
حربينا يسهر وعينه ماتنام = لاشافنا عند الحدود مخيمين
ولا على جيرانا برد و سلام = نفزع لمن يزهم وعون المستعين
مبداه ذكر الله وفي تالي الختام= نذكر شفيع الخلق سيد المرسلين

الشاعرالمغفور له بأذن الله / سعد بن راشد القاطع الصبيح الخالدي.

[فهد الشبيب]

عينك غدير بنتظار قصيدة


الله العالم


:)

واعذرررررررررررنا

[عينك غدير]

الشاعر المرحوم / سعد القاطع هو من كبار شعراء بني خالد في مدينة عنك وهو غني التعريف وله العديد من القصائد الجزله وهذه القصيده احدى قصائده الحماسيهيقول فيها الشاعر/

يقول الخالدي والعالم الله = وخلقه كلهم مايعلمونا
هوالفرد الصمد لاشي غيره = وبأمره يودع الكايد يهونا
نسأل النصر منه والمعزه = والله نعم نصر ونعم عونا
كفى الله شر دورات الليالي = وفيهن عبرة للفاهمونا
وفيهن من تعد انه صديق = وهو يطعنك مابين المتونا
صديق الرخا مافيه خير = يضحك لك وله بالضحك شونا
صديقك من حضر وقت اللوازم = وخلان الفراغات يهبونا
ندف الشر ونريد السلامه = نقول الشر عله مايكونا
ولا عيوا مدورات البلاوي = وتمدوا في خطاهم وابتلونا
بعون الله هل البطولات حنا = وأبانا للمعارك دربونا
هبيل الرأي يا باغي وطنا = توهقك الهقاوي والظنونا
تمدى لين تنشب في لقانا = تموت وكل قومك يذهبونا
لو انه من بغانا قد خذانا = قرود الناس قبلك قد غزونا
ولا حنا بأهل مكر وخديعه = ولا الجيران منا يشتكونا
ولا حنا بغينا الحرب نعلن = بفعل كل الامه يشهرونا
ولا والله نبغي قتل العروبه = وقشران الزعامات ابتلونا
ياما صرنا لهم بالحرب مسند = وقدمنا لهم من كل عونا
ولا من صابهم بعض الهزايم = من اللي غير جونا وازهمونا
بلى الله بالمصايب كل خاين = لجزلات الجمايل يجحدونا
ديار العرب عشت يابلادي = واهلك اللي لحدك يحتمونا
سقاك الله من هدب السحايب = ليال الوسم من غر المزونا
حقوق منه يمشي كل وادي = وفيه اهل الحلال يرعبونا
وفيه الورق لا من زان كيفه = يهز الريش ويجر اللحونا
ديار اللي تزبن كل خايف = واهلها بالغريب يرحبونا
ومن جاهم سكن برأس عيطا = جميع الناس له ما يا صلونا
بني عبدالعزيز طيور شلوى = هل التوحيد بإسمه يعرفونا
سيوف الماص عطبات الضرايب = تزيل الروس من عالي المتونا
صخور ما تحركها الهبايب = جبال النور عالية الركونا
وحنا لازما العايل زمينا = بقوم لا تذل ولا تخونا
على كبد المعادي سم سامه = وزرنيخ خضر يعمي العيونا
هل النشر الخضر والموت الاحمر = ليا ثار القهر ما يقهرونا
ولا ثارت الهيجا ترانا = نبيع الروح للي يشترونا
نبيع الروح من شأن المعزه = ولا نصبر بحقران وهونا
ومن عاداتنا نقتل عدانا = لما باقين قومه يهربونا
وصلى الله على الهادي محمد = نبي الدين سيد المرسلونا

اهدي هذه القصيده الى الاخ * فهد الشبيب * بناء على طلبه ,
تقبل تحيات اخوك / عينــــــــــــــك غديـــــــــــــر

[فهد الشبيب]

اشكرك ياخوي عينك غدير وعز الله ماقصرت يالقرم والله انك كفو


وانا حبيت ان القصايد تكون مجموعه سوا قبل ان يباشر الاعضاء بالرد




تحياتي لك ياحلالي

:):):):):):):):):):):):):):):):)

[ابو رجا]

جعل اعظام ابو راشد الجنه وبس .
لاهنت يالنايف ماتجيب الا الشي الزين.
ولاهنت يابو حمد
وماقصرت ياعينك غدير .

[مغترب في عذاب]

الله يرحم شاعرنا الكبير سعد القاطع

وموتانا وموتى المسلمين

لا هنتوا يا الغالين

تحياتي

[متعب الخالدي]

الله لا يهينكم عز الله

ما قصرتوا ..

بيض الله وجيهكم
والله يرحم الشاعر الكبير../سعد القاطع

[سالم بن محمد]

صح السان شاعرنا الكبير / سعد بن راشد ال قاطع والله يجزاكم الف خير على النقل الرائع للشعر المتميز من شاعر متميز وتقبلو تحياتي يا بني عمي

[بدر الخالدي]

الله يرحم الشاعر الكبير سعد بن راشد ال قاطع وصح لسانه

ويجعل عضامه للجنه

ولاهنتو ياعيال العم الاعزاء على النقل الرائع

وخصوصا الاخ النايف ابونايف

[فهد الشبيب]

لاهنتو ياجماعه وبيض الله وجيهكم على الجهد هذا

[النايف]

فهد البويدي
عينك غدير
مشكورين على الاضافة
وياليت كل من يعرف اي قصيدة ليو راشد رحمة الله يضيفها حتي نساهم بحفظ قصائد شعارنا


والشكر والتقدير لكل من مر على المشاركة

ابو نايف

[البرتقاله]

لاهنت يالنايف على الموضوع المميز


صح لسان الشاعر

وسلمتوا


تحياتي للجميع

[ابو راشد]

تسلم يا النايف. الحقيقه عودتنا على المواضيع القيمه والمفيده والهادفه.

رحم الله الشاعر الكبير/ سعد القاطع الخالدي